CEBU, Philippines - Human sa malamposong Game 1, way laing tumong ang defending champion Los Angeles Lakers kung dili ang usban ang Boston Celtics atol sa Game 2 sa ilang best-of-seven championship series sa 2010 NBA Finals nga adto gihapon ipahigayon sa Staples Center sa Los Angeles, California.
Naunhan sa Lakers ang Celtics pinaagi sa ilang 102-89 nga kadaugan diin ilang gidominar ang duwa gikan sa pagsugod sa third period diin sila milabaw ug 20 puntos, 84-64.
Tuyo nilang Kobe Bryant ug Pau Gasol nga mosaler gihapon ang ilang opensa taliwala sa pagpangansam sa mas hugot nga depensa nga ipatuman karon sa Celtics nga buot motabla sa duwa aron dili sila magtangag ug 0-2 nga biya atol sa pagtapon sa tulo ka duwa didto sa TD Banknorth Garden sa Boston, Massachusetts.
Mibahug si Bryant ug 30 puntos ug midugang si Gasol ug 23 puntos ug ang wala nila paabota nga mobahug sab diay ug maayo si Ron Artest.
Atol sa maong duwa, wala makatabang sa Celtics si Ray Allen kay naglingkod siya bale’g 21 minutos tungod sa sayo kaayong foul trouble nga iyang nahimo.
“It was frustrating. I couldn’t buy a whistle, men. What can you do?” matud pa ni Allen kinsa igo lang mipuntos ug 12 sa maong kapildihan.
Tungod kay daku man siya’g ikatabang sa opensa, maoy gusto ni coach Doc Rivers nga dili sige magpunay og kubit ug foul samtang anaa sulod sa korte aron taas-taas siya’g playing time.
Kalabot karon sa ilang game plan nga dili na papuntoson ug maayo silang Bryant ug Gasol aron duna sila’y kahigayonan sa pagdaug ug sa samang paagi, maka-amot sab si Allen uban kang Paul Pierce ug Kevin Garnett.
Buot sab ni coach Rivers nga moamot sa opensa ang ilang bench nga naglakip kanilang Rasheed Wallace, Glen “Big Baby” Davis, Tony Allen, Nate Robinson ug ang wala pa gyud maka-arte nga si Michael Finley, usa ka beteranong player nga may duha ka korona didto sa San Antonio Spurs.
Matud pa ni Allen, dili niya problema alang kaniya ang pagpugong kang Bryant tungod kay nakahimo man gani siya pagdepensa kanilang Dwayne Wade ug usahay kang Dwight Howard atol sa playoffs.
Andam na sab alang sa Game 2 si Rajon Rondo kinsa miangkon nga iya nang nahuman og tan-aw ang tape sa wala pa siya matulog didto sa ilang hotel nga gipuy-an.
Sa iyang bahin, si Garnett nagkanayon “You learn a lot about yourself when you lose. You learn a lot about yourself when you’re down. This shows what you’re made of.”
Ang preliminary series sa Game 1 tali sa Lakers ug Celtics niadtong Biyernes misaka ngadto sa 17 por siento ug mas labaw kini kung itandi sa 8.9 por siento atol sa Lakers-Magic finals sa miaging tuig. GGM gikan sa NBA.com