CEBU, Philippines - Napulo'g pito (17) ka golds, ug duha ka silvers ang nahakot sa Cebu Blue Marlins sa unang adlaw sa ilang kampanya sa G-League Series 3 and 4 kagahapon didto sa Roxas City.
Ang managsuong Noel ug Trina Cañeda maoy daku'g natampo alang sa CBM ni coach Rolando Alvarez nga adunay upat ka bulawan matag usa.
Gipakita nila ang ilang katakus aron pagdaog og bulawan sa 200m freestyle, 50m backstroke, 100m breaststroke ug 200m individual medley relay.
Gawas sa Cañeda siblings, ang managsuong Vega ug Navarro mihakot sab og dugang mga medalya alang sa ilang team.
Sila si Anthony ug Lyn Ann Navarro mitunol og tulo ka golds matag usa. Si Anthony nikabkab og bulawan sa 50m backstroke, 100m breaststroke ug 200m IM, samtang si Lyh Ann nakubkob og bulawan sa 200m freestyle, 50m backstroke ug sa 200 IM.
Sa iyang bahin, si Paula Abigail Vegas midugang sab og tulo ka bulawan pinaagi sa 200m IM, 50m ug 200m backstrokes events, samtang ang iyang igsuong si Michael David mihatag og duha ka silvers. (BANATNEWS)