CEBU, Philippines - Puno sa aksiyon ang masaksihan sa boxing fans dihang ang ALA Promotions uban sa ABS-CBN Sports mopasiugda'g kulbahinam nga boxing event ugma diha sa Waterfront Cebu City Hotel and Casino.
Uloha'g "Hangad na Paghihiganti," moaway sa main event mao ang mga dekalibreng boksidor sa bantamweight division nga sila si Michael Domingo ug Luis Melendez sa Colombia.
Kahinumduman, si Melendez maoy nakapahunong sa boxing career ug naka-paralisar ni local boxing hero Z Gorres.
Si Gorres nalup-og human maigo sa kalit ug makabungog nga hook ni Melendez sa round 12 atol sa ilang sangka niadtong Nobiyembre 13 sa miaging tuig didto sa Mandalay Bay House of Blues sa Las Vegas.
Tungod niini, napun-an ang kusog ug paningkamot ni Domingo, kinsa nangahas nga mobawos ngadto sa bisitang si Melendez.
Gawas sa pagpanimalos, usa usab kini ka dakung oportunidad ni Domingo aron makab-ot ang gidamgo niyang world title fight.
Si Domingo gitakda na untang mo-away alang sa WBO title batok ni Fernando Montiel, apan kalit lang misibog ang Mehikano sa way igong rason.
Samtang sa supporting bout, ang bag-ong nasakop sa ALA Gym nga si Jimrex Jaca mopakita usab sa iyang abilidad batok ni James Kimori sa Kenya. Mahinungdanon alang ni Jaca ang modaog aron mabalik iyang ngalan isip usa sa mga kusgang boksidor sa 137 lbs. division.
Nalakip usab sa undercard ang mga ALA rising stars nga sila si James Bacon ug Jason Pagara nga makigbinukbukay batok nila ni Cerilo Espino sa Batangas ug Romeo Jakosalem sa
Davao.
Ang mga tiket nagkantidad og P1,500 alang sa VIP 1st row, P1,250 sa VIP 2nd row, P1,000 sa VIP 3rd row, P500 sa ringside, P300 sa ballroom ug P250 sa balcony. – BANAT NEWS