CEBU, Philippines - Nahilis ang 20 puntos nga labaw sa Brokers Selection, apan nakarekober kini sa final period aron mo-iskor og 89-81 nga kadaugan batok sa Customs All-Star sa ilang dumot nga duwa niadtong Miyerkules sa gabii didto sa Benedicto College gym sa Banilad Mandaue City.
Gisalibay sa Brokers ni team manager Yoli Cena ug ni playing coach Janno Boniao ang ilang 45-25 nga bentaha sa tunga-tungang bahin sa second period diin nahimo na lang kining 15 puntos sa halftime, 53-38.
Mao kadto ang ilang ikatulong sunod-sunod nga pilde sa Customs ug mao sab kadto ang pinakada-best nga duwa tungod kay gawas nga ilang gipapas ang 20 puntos nga biya, nakalabaw pa kini og labing menos tres puntos sa makaduha ka higayon, 66-63 pinaagi sa basket ni Jan Mose ug 68-65 sa basket ni Jerold Datu sa wala pa sila hingpit mosukarap didto sa fourth period tungod sa kakulang og players.
Si Loreto Castillo miantog og 30 puntos aron pangulohan ang Brokers, samtang si Gelran Gelboligo miamot og 17 puntos ug si Amay Palad miduga'g 15 puntos.
Ang Customs All-Star nila ni coach Dione Edera ug Boodie Monteño gipangulohan ni Mose pinaagi sa iyang 21 puntos, gisundan ni Ferdie Laraga nga adunay 15 puntos.
Si Mactan Collector Bingo Matugas, kinsa miposa'g tulo ka three-pointers ug si Mamasao Capala parehong mi-iskor og 12 puntos ug si Jingjing Rama, kinsa wala motiwas og duwa tungod sa importanteng lakaw miabuno'g 11 puntos.
Puntos Matag Usa
Brokers (89) - Castillo 30, Gelboligo 17, Palad 15, Gonzales 8, Agustinez 7, Boniao 3, Cena 3, Sala 2, Avenido 2, Pabon 1
Customs (81) - Mose 21, Laraga 15, Matugas 12, Capalan 12, Rama 11, Lopez 6, Datu 4, Remonde 2. – BANAT NEWS