CEBU, Philippines - Parehong gilampurnas sa team Tonitas-IFI ug sa Y-Rock ang tagsa-tagsa nila ka kaatbang aron pagsakmit sa korona sa juniors ug midget divisions sa Cansojong Talisay SK summer basketball tournament niadtong Domingo didto sa Brgy. Cansojong open court.
Talagsaon kaayo ang maong hitabo tungod kay ang underdog nga Tonitas maoy gideklarar nga kampiyon kay ang kontrang Caniva nagdumili na sa pagduwa sa overtime dihang nagtabla ang iskor human sa regulasyon, 79-all.
Gumikan niini, gihatag sa Cansojong SK chairwoman April Cabigas ang juniors division title ngadto sa Tonitas isip winner by default.
Sa sayo pa, ang Y-Rock yano kaayong milubong sa KYM pinaagi sa pagkulit og 80-52 nga kadaugan aron sakmiton ang korona sa midget division.
Si Jayvon Rosagaran maoy napiling MVP sa juniors division, samtang si Rogelio Pogoy maoy napiling MVP sa midget division.
Gawas sa P500 nga ganting salapi, ang duha nga maoy nangulo sa Mythical Five sa tagsa-tagsa nila ka dibisyon nakadawat sab og tropeyo ug medalya.
Ang mga sakop sa Mythical Five sa juniors division mao sila si Rosagaran, Mark Salgado, Ondong Abasanta ug sila si Heroche Molero ug Duprey Reyes nga parehong sakop sa CIT Wildcats. Samtang sa midget division mao sila si Pogoy, Jerel Bacusmo, Roguam Novan, Marjun Ando ug Ariel Acachupas. – BANAT NEWS