CEBU, Philippines - Duha ka notadong Sugbuanong runners uban sa laing tulo ka beterano gikan sa Manila ang miibot sa championship crown sa Laguna de Bay Challenge: 200-Km Ultra Marathon Relay dili pa dugay didto sa Laguna de Bay.
Si kanhi University of the Philippines Foundation (USPF) running varsity athlete Mendel Lopez ug ang pambato sa Southwestern University (SWU) Miscelle Gilbuena, kinsa nakighugpong sa puwersa nilang Eric Panique, Ben Alejandrino ug Ireneo Raquin mipukan sa laing lig-ong kontra nga mao ang Air Force squad ug Bald Runners nga nalandig sa ikaduha ug ikatulo nga mga dapit.
Ang first leg sa duha ka adlaw nga lumba didto sugdi sa Fontera Verde sa Pasig City ug gitapos sa Laguna Provincial Capitol sa Sta. Cruz, Laguna.
Miabante nang daan ang grupo ni Lopez sa first leg ug gipalapdan ang ilang labaw sa second leg aron pagbulsa sa P350,000 nga ganting salapi.
Sa pikas bahin, ang hara sa kalsada dinhi sa Sugbu nga si Mary Grace delos Santos ug iyang team mitapos sa ikalima.
Gawas niini, si Delos Santos mao sab ang labing maayo sa iyang heat.
Ang team ni Delos Santos nakadawat og P50,000 ug dugang P10,000 alang ni Delos Santos human sa kadaugan sa iyang lap. – BANAT NEWS