MANILA, Philippines - Dumaan muna sa butas ng karayom si Warren “Warrior” Kiamco bago matumbok ang isang qualifying ticket para sa 16th Asian Games sa Guangzhou, China.
Tinalo ni Kiamco si Ronnie “Volcano” Alcano, 15-14, sa final round ng 9-ball event sa Asian Games qualifying tournament ng Billiards and Snooker Congress of the Philippines (BSCP)sa Rizal Memorial Billiards Center.
Bukod kay Kiamco, ang iba pang nakakuha na ng Asiad seat ay sina Efren “Bata” Reyes (8-ball at English Billiards), Roberto “Pinoy Superman” Gomez (8-ball), Dennis “Robocop” Orcollo (9-ball), Reynaldo Grandea (Carom), Rodolfo “Boy Samson” Luat (3-Cushion), Rubilen “Bingkay” Amit (9-ball), Irish Ranola (8-ball) at Mary Ann Basas (6-red ball).
Nakatakda ang 2010 Guanzghou Asian Games sa Nobyembre 12-27.
Matapos kunin ni Kiamco ang malaking 14-7 abante, nakabangon naman si Alcano upang itabla sa 14-14 ang kanilang labanan.
“Magaling talaga si Ronnie, talagang world champion. Kasi kahit nakalamang agad ako ay talagang humabol siya at muntikan pa akong matalo. Buti na lamang sumablay siya sa No.6 ball sa last rack,” ani Kiamco kay Alcano.
Bago makasagupa si Alcano sa finals, tinalo muna ni Kiamco si Ricky “Bai” Zerna, 13-10, samantalang binigo ni Alcano si Joven “The Shark” Bustamante, 13-10, sa semifinals.