CEBU, Philippines - Ang nabantog nga Ramon Fernandez Basketball Academy (RFBA) inabagan sa Geffen CMD Plus mosugod na’g panawat og mga partisipante alang sa tulo ka adlaw nga summer basketball clinic.
Himuon kini karong Abril 21-23 gikan sa alas-2 hangtod sa alas-5 sa hapon diha sa Active Zone sa Ayala Center-Cebu.
Babaye’g lalaki nga nag-edad og sayes anyos ug pataas nga buot makat-on sa duwang basketbol mahimong mosalmot sa maong summer clinic.
Si Fernandez, kinsa naila nga “El Presidente” mao mismo ang mangunay og tudlo sa mga kabataan.
Iyang tudloan ang mga bata sa mga importanteng pamaagi sa duwang basketbol lakip na ang ball handling, shooting, passing, running, pivoting, agility check ug uban pa.
Kadtong interesadong mosalmot ug buot magpakisayod sa maong clinic mahimong mokontak ni Fernandez sa mga numero 09209327502 o 582-5424.
Si Fernandez mihakot na’g upat ka MVP awards ug record nga 19 ka korona.
Ipaambit sab ni Fernandez ang iyang taas nga kasinatian sa basketbol atol sa tulo ka adlaw nga clinic.
Moabag ni Fernandez sa clinic mao si ex-PBA star Stephen Padilla, kinsa mipasilong sa landong sa M. Lhuillier Kwarta Padala-Cebu Niños ug si University of Cebu (UC) Webmasters assistant coach Caleb Gawangon. –BANAT NEWS