CEBU, Philippines - Nagpadayon si Mark Jason Melligen sa pagtuman sa iyang damgo nga mamahimong world champion, human siya midominar batok sa Mehikanong si Norberto Gonzales sa ilang sangka kagahapon didto sa Hard Rock Hotel and Casino sa Las Vegas.
Human sa kapildehan niya batok ni Michel Rosales niadtong miaging tuig, daghan ang nagduda sa abilidad ni Melligen nga mulampos sa welterweight division, apan ning higayuna gipakita sa ALA boxer nga seryuso siya sa iyang kampaniya didto sa Las Vegas.
Ang 23-anyos nga si Melligen mikulata ni Gonzales hangtud sa round 10 aron masakmit ang unanimous decision nga kadaugan sa main event sa "Battle of the Hard Rock".
Si Melligen kinsa atoa na nagbasi sa Las Vegas ubos sa giya sa iyang trainer nga si Tony Martin, maoy mikontrol sa away pinaagi sa pagpugos ni Gonzales sa pag-atras ngadto sa pisi ginamit ang iyang mahait nga straight.
Ang kaagresibo ug lig-on nga depensa gipadayon ni Melligen hangtud sa katapusang bagting sa kampanilya nga maoy nakahatag kaniya og pabor sa puntos batok Mexican knock-out artist.
Sa round 9, gibirahan pag maayo ni Melligen si Gonzales, diin naigo sa solidong hook ni Melligen ang Mehikano nga napugos pagluwa sa iyang mouthpiece.
Sa maong kadaugan si Melligen mipalambo sa iyang rekord ngadto sa 18-2-1, 13Kos, samtang si Gonzales nakahigaum sa ikaduha niyang pilde sulod sa 20 niini ka away.
Bugti usab sa iyang kalampusan, si Top Rank Inc. bigboss Bob Arum misaad nga hatagan si Melligen og mga dagkung away nga maoy mutabang niini sa pag-uswag sa ranking alang sa usa ka world title fight. - BANAT NEWS