CEBU, Philippines - Wala matay-og ang top seed Mactan Hotmen ni Collector Bingo Matugas sa gihimong pagpanghulga sa Canillas-Gonzales Brokerage sa makaduha ka higayon ug mi-iskor og 80-69 nga kadaugan aron mo-abante sa semifinals Bureau of Customs (BOC) 1st Port of Cebu Sportsfest basketball tournament didto sa Benedicto College gym sa barangay Banilad, Mandaue City.
Miabante sab sa semis ang second seed Pimentel-D Force ni team owner Marty Pimentel human midaog batok sa Port Inspection Division (PID), 76-60.
Si Ronnie Ruiz mi-iskor og 13 sa iyang topscoring 20 puntos pinaagi sa nag-aso asong fastbreaks aron hatagan ang Hotmen og 38-27 nga bentaha sa halftime.
Si Ferdie Sigue, kinsa mituhog og upat ka triples ug si Bibit dela Cerna miduslit og hamubong rally nga nakapasikit sa Canillas-Gonzales ngadto sa dos puntos, 45-47 sa nahabiling 2:55 sa ikatulong kuwarter, apan wala kini makatay-og sa Hotmen kinsa, mipabuhagay sab og mga puntos aron inaton ang labaw. Ang Canillas-Gonzales subling nakasikit, 51-53 human sa triple ni Sigue, apan ang ilang mga paningkamot nausik lang kay ang Hotmen padayong mibuhi sa init nilang opensiba aron makab-ot ang 11 puntos nga kadaugan.
Si Jessie Bugtai, kinsa misuporta ni Ruiz mihipos og 14 puntos, samtang si Ronnie Clapano miamot og 11 puntos.
Si Sigue mao sab ang nangulo sa Canillas-Gonzales sa iyang 15 puntos, gisundan ni Cecil Conga nga adunay 12 puntos.
Puntos Matag Usa
Unang duwa:
Mactan Hotmen (80) - Ruiz 20, Bugtai 14, Clapano 11, Jayme 8, Ambrad 4, Sesante 3, Maningo 3, Ararao 2, Mata 2, Ramos 1, Yu 1
Canillas-Gonzales (69) - Sigue 15, Concha 12, Castro 10, Villa 6, Arevalo 5, Dela Cerna 4, Delos Reyes 3, Padin 2, Belarmino 2, Campos 2, Labe 2, Gonzales 2
Ikaduhang duwa:
Pimentel (76) - Macasero 10, Mariano 9, Ibo 9, Borromeo 8, Pangue 8, Bensi 8, San Pablo 8, Arong 6, Allerte 6, De Gracia 4
PID (60) - Urbina 21, De Leon 11, Laraga 9, Reman 7, Flores 2, Gaquing 2, Datu 2, Horca 2, Repeula 2. – BANAT NEWS