CEBU, Philippines – Mag-ensayo didto sa Japan si Michael Domingo sa ALA Boxing isip kabahin sa iyang pagpangandam alang sa nagsingabot niyang sangka batok ni Colombian Luis Melendez karong Mayo 1 diha sa Cebu City Waterfront Hotel and Casino.
Si Antonio L. Aldeguer, ang founder sa ALA Gym mipahibalo nga si Domingo makig-sparring ni WBC bantamweight king Hozumi Hasegawa.
Sumala pa ni Aldeguer nga daku'g matabang sa pagpalambo sa game plan ni Domingo ang pakig-spar niini batok ni Hasegawa. Si Hasegawa moharong ni WBO bantamweight titlist Fernando Montiel karong Abril 30 didto sa Tokyo, Japan.
Ang paglarga ni Domingo didto sa Japan nagpakita nga seryoso siya sa iyang tinguha nga mobuntog ni Melendez, kinsa mipilde sa iyang stablemate nga si Z 'The Dream' Gorres.
Si Melendez maoy responsable sa pagkabugto sa boxing career ni Gorres human sa insidente nga nahitabo sa ilang sangka niadtong Nobiyembre 13 didto sa Mandalay Bay sa Las Vegas. - Lemuel P. Maglinte (BANAT NEWS)