CEBU, Philippines – Tungod kay dili magamit ang Cebu Coliseum karong adlawa, ang "best-of-five" sa 4th CESAFI Partner's Cup tali sa Ave Maria Sanctuary Park-USJR Jaguars ug San Marino Corned Tuna-USC Warriors giuswag ngadto sa Abril 9.
Mao kini ang gipahibalo ni league commissioner Felix O. Tiukinhoy Jr.
Ang USJ-R ug USC parehong nagtinguha nga mamahimong unang team nga modaog og duha ka Partner's Cup titles.
Sa kasaysayan sa Partner’s Cup , wala pay koponan nga midaog og duha ka titulo o nakadepensa sa ilang korona.
Ang unang kampiyon mao ang CDO-UV Lancers, tulo ka tuig na ang milabay. Sa sunod tuig, ang Lancers tuyong wala modepensa sa ilang korona dihang misalmot kini sa nabungkag na karon nga Visayas Amateur Athletic Association (VAAA) nga maoy naghatag og higayon sa Bibbo-USJR paglangkat sa titulo.
Atol sa ikatulong season sa miaging tuig, ang UV ug ang USJ-R parehong napakyas pag-abante sa finals ug naghatag og dalan aron mahimong kampiyon ang Hotel Fortuna-SWU Cobras kinsa midaog batok sa Enervon-UC Webmasters sa finals.
Sa laing bahin, si deputy commissioner Danny Duran mibutyag nga ang secondary finals unya pa duwaon sa Abril 21 tungod kay ang UV Baby Lancers morepresentar sa Central Visayas sa Palarong Pambansa sugod karong Abril 10 didto sa Tarlac City.
- Gabby G. Malagar (BANAT NEWS)