CEBU, Philippines - May upat na ka commercial teams ang kompirmadong mopakita'g aksiyon sa 2010 BLISS Pajac Fiesta Open basketball tournament nga sugdan karong Abril 11 diha sa Brgy. Pajac basketball court sa Lapu-Lapu City.
Kini mao ang Ave Maria Sanctuary Park, San Remigio Beach Club, Rollway Freight Forwarders ug ang Sol Meat.
Ang torneyo gibahin sa duha ka kategoriya -- C-open ug LLBA. Ang C-open bukas sa tanang varsity ug commercial players, samtang ang LLBA alang lamang niadtong mga teams nga miyembro sa Lapu-Lapu Basketball Association.
Ganting salapi ang nagpaabot alang sa top three winners.
Ang makampiyon mobulsa og P20,000, mopahiluna sa ikaduha makadawat og P10,000 ug ang ikatulo makaangkon og P5,000.
Si LLBA treasurer Ely Gomos, kinsa maoy mipasiugda sa maong torneyo, miawhag niadtong interesadong mosalmot sa pagduso sa ilang line-ups. Ang deadline hangtod lamang sa Abril 4.
Alang sa dugang mga detalye, mahimong mokontak ni Ely Gomos sa 5160660 ug 3403814. – BANAT NEWS