CEBU, Philippines - Misulbong ang panagpares nila ni Winnie Ocañada ug Rayden Colina ug maoy mihari sa ikatulong edisyon sa Yayoy's Grill and Resto Bar weekly darts tournament.
Gilangkat nilang Ocañada ug Colina ang titulo human gipilde ang tandem nilang Rolly Maurinos ug Steban Montenegro sa finals.
Ang anak ni Cebu City Councilor Raul 'Yayoy' Alcoseba nga si Ramon 'MonMon' Alcoseba misurpresa sa ubang mga darters human mipahiluna sa ikatulo uban sa beteranong si Odong Pamatian.
Mitungtong sa ikaupat nga dapit mao ang paresan nilang Winnie Abella ug Jerome Perales, samtang ang father-and-son tandem nilang Bert ug Madz Colong mikapyot sa ikalima.
Mikompleto sa top eight winners mao ang paresan nilang Itong Badayos ug Mon Montecillo, Morex Galanza ug William Encorporado ug Alvin Villa ug Jorgen Villamor.
Ang senemanang doubles competition sa Yayoy's Grill kabahin sa proseso sa pagpili aron maoy morepresentar sa Cebu alang sa national event sunod bulan dinhi sa Sugbu. (BANATNEWS)