CEBU, Philippines - Gipangpukan sa University of Southern Philippines Foundation (USPF) ug Team Froilan ang tagsa-tagsa nilang kaatbang aron makuha ang lingkoranan sa kampiyonato sa 2nd Talisay Beach Volley kagahapon didto sa Poblacion, Talisay City.
Ang USPF nilang Apple Eve Saraum ug Mechelle Matuguina misakmit sa unang luna sa finals human gipilde ang tandem nilang Kennette Garces ug Marissa Lagancia sa Volleyball Addict,
25-14.
Alang ni Saraum, ang torneyo kabahin sa iyang pagpangandam alang sa 14th Nestea Fit Beach Volley Champions Cup nga gikatakda karong Abril 22-25 didto sa Boracay Island.
Sa laing bahin, ang team Froilan nga gimaneho ni RP Team member Jusabelle Brillo ug kanhi RP Youth standout Gerie Sabas, miangkon sa katapusang luna human usab nila gipilde ang tandem nilang Metosheena Bate ug Suzette Paris sa University of San Carlos, 25-15.
Gawas sa mga medalya ug tropeyo, ang makampiyon mobulsa og P5,000, samtang ang second placer makadawat og P3,000, samtang ang third placer makadawat og P2,000. – BANAT NEWS