CEBU, Philippines - Tuyo sa PTT Fuels-UV Lancers mao ang pagsakmit og luna sa semifinals karong adlawa dihang ilang sangkaon ang sixth-seed Prime Asia-DBTC Greywolves, mao sab ang UV Baby Lancers sa ilang pakigbatok sa Aerosol-USPF Baby Panthers sa pagpadayon sa quarterfinal round sa 4th CESAFI Partner’s Cup diha sa Cebu Coliseum.
Sa ilang twice-to-beat advantage, hayan dili na magmakuli sa pag-abante ang Lancers, kinsa midaog sab batok sa DBTC atol sa elimination round. Ang Lancers nalabay sa ikatulo nga dapit human mapilde ngadto sa San Marino Corned Tuna-USC Warriors.
Gawas ni Rudy Enterina Jr. ang Lancers magsalig sab sa ilang beterano ug key players sama ni Edrian Lao, Phil Mercader, Emana Calo, Ralf Olivares, Harold Cincoflores, Mark Manigque, Marl Senere ug Elmer Mykiel Cabahug.
Sa laing bahin, ang Greywolves magsalig nilang Celso Colegado Jr., Vincent Castro, Alain delos Santos, Chris dela Rama Jefford Aldave ug Joseph Villaver. (BANATNEWS)