CEBU, Philippines - Wala kapugngi ang Talk N. Text Tropang Texters sa ilang pagpanulong dinhi sa Sugbu human ilang gipilde ang M. Lhuillier Kwarta Padala-Cebu Niños, 87-79 kagabii diha sa Cebu Coliseum.
Ang import nga si Eric Hicks mikudlit dayon og 25 puntos, samtang ang mga higanteng sila si Ali Peek ug Harvey Carey mitusod og 14 ug 11 puntos matag usa alang sa Texters, kinsa midaog sa unang duwa sa duha ka adlaw nilang exhibition games batok sa Niños.
Ang ikaduhang duwa himuon ugma sa alas-6 sa gabii diha gihapon sa Cebu Coliseum.
Nahimong labad ni Niños coach Raul 'Yayoy' Alcoseba ang 6-foot-6 nga si Hicks, kinsa mihipos og 13 puntos sa first half aron ihatag sa Texters ang otso puntos nga bentaha sa halftime, 43-35
Wala hinuon usab magpabitin ang import sa Niños nga si Jason Forte, kay dihang igo lang siya mi-iskor og dos puntos sa halftime, namawi kini sa third period pinaagi sa paglansang og 12 puntos.
Ang beteranong si Stephen Padilla mipasulod usab og duha ka sunod-sunod nga triples nga maoy mikitkit sa labaw ngadto na lang sa uno punto, 61-62 paingon sa final period.
Nagpadayon ang kainit sa opensiba ni Forte sa fourth period aron hatagan ang Niños og uno punto nga labaw, 73-72. Anugon lang ang iyang paningkamot kay wala kaayo kini makakuha og igong suporta gikan sa mga lokal.
PUNTOS MATAG USA
Talk N’ Text (87) – Hicks 25, Carey 14, Peek 11, Alapag 11, Cardona 8, Yee 5, Dillinger 3, Castro 2, Isip 2, De Ocampo 2
Cebu Niños (79) – Forte 22, Padilla17, Santos 13, Ababon 8, Dacia 7, Mepaña 5, Basco 3, Nailon 2, Enriquez 2 (BANATNEWS)