CEBU, Philippines - Laraw karon ni Kenyan missionary Simon Losiaboi nga ilogon pagbalik ang nahanaw niyang dungog sa dihang modagan kini sa 1st Quota International Run sayo ning buntag diha sa The Terraces sa Cebu Business Park.
Human maputol ang nagkadina niyang 13 ka kampiyonato niadtong Domingo sa 2nd Rotary Run, si Losiaboi porsigido karon nga mosakmit og titulo sa 12K men’s open.
Nasayran nga niadtong 2nd Rotary Run, napakyas si Losiaboi pagsakmit sa daog human siya gi-disqualify sa technical committee tungod sa pag-ilis niya og race number nga wala gipahibalo ngadto sa mga race officials.
Dili hinuon sayon ang tahas alang ni Losiaboi tungod kay subli siyang makiglumba batok ni RP Team member Mendel Lopez ug Elmer Bartolo.
Sa laing bahin, si Cebu City Marathon second placer Mary Grace Delos Santos mao usab ang mangulo sa 12K women’s open uban sa Sugbuanang si Madelyn Carter.
Ganting salapi ang nagpaabot sa mga mananaog sa matag dibisyon.
Gipasiugdahan sa Quota International–Talisay Chapter, tumong sa maong lumba mao ang makatigom og salapi nga itabang ngadto sa mga kabataan nga adunay kakulian sa pandungog, panan-aw ug ingon man amang. (BANATNEWS)