MANILA, Philippines - Natikman ni reigning WPA Women’s World 10-ball, champion Rubilen Amit ang kanyang unang pagkatalo matapos na payukurin ni Yuan Chun-Lin ng Chinese Taipei, 5-7 sa pagpapatuloy ng hostilidad ng 2010 Amway WPA Women’s World 9-Ball Open kahapon sa Core Pacific Living Mall Hotel sa Taipei, Taiwan.
Bunga ng kanyang nalasap na kabiguan, bumagsak si Amit sa 2-1 win-loss card sa Group E stage match habang umangat naman si Yuan Chun- Lin na mayroong malinis na 3-0 win-loss card.
Unang dinispatsa ni Amit ang mga kalabang sina Maureen Seto ng Canada (7-1) at Kynthios Orfanidis ng Netherlands (7-4), ayon sa pagkakasunod nitong Huwebes habang dinaig naman ni Yuan Chun- Lin sina Orfanidis (7-4) at kababayang si P. C. Lin (7-4), ayon sa pagkakasunod. Tanging pag-asa ni Amit na makapasok sa susunod na round ay maipanalo ang nalalabing laban.
Kabilang sa may 2-1 win-loss slate sa Group E sina WPA Women’s World No.1 Karen Corr ng Ireland na nakabalik sa kontensyon matapos na manalo kina Maureen Seto, Canada ng, (7-1) at Kynthios Orfanidis ng Netherlands, (7-2).
Ang Group stage ay hinati sa 8 groups na may tig 6 players sa bawat group. Ginamit sa competition ang race-to-7 round-robin format na may nakalaan na US $20,000 top prize.