CEBU, Philippines - Usa ka dosena na ka koponan ang nikompirmar sa ilang partisipasyon alang sa 2nd Osky Mabilog Memorial Cup National Age-Group and Person With Disability Swimming Competition ug 2010 National Youth Team Selection nga gitakda karong weekend diha sa Cebu City Sports Center.
Ang maong kompetisyon nakadani og daghang mga koponan gikan sa nagkalain-laing dapit sa nasud uban sa host Cebu Blue Marlins nga maoy labing daghang delegasyon nga 40 ka swimmers.
Lakip sa mohagit sa Blue Marlins ni coach Rolando Alvarez mao ang Silliman University Red Snappers, Biniyaran Tadpoles Swimming Club, Negros Oriental Blue Dolphins, Bohol Dolphins, 1st United Davao Swim Club, North Shores Waves, Negros Occidental Golf and Country Club, Dadiangas Torpedoes, Cagayan de Oro, Costland-Davao, GenSan Warriors ug ang Paranaque Thunder Swim Club.Ang duha ka adlaw nga kompetisyon nga gipasiugdahan sa Cebu Blue Marlins Swimming Club ug sa Philippine Aquatic Sports Association (PASA), usa sa mga kalihukan sa kasaulogan sa Cebu City Charter Day.
Ang mga swimmers bahinon sa nagkadaiyang kategoriya -- 18 years old ug pataas, 15-17, 13-14, 11-12, 9-10 ug 7-8.
Sa laing bahin, ang atleta nga adunay disabilities magtigi sa upat ka events -- 50m freestyle, butterfly, backstroke ug breaststroke. – BANAT NEWS