CEBU, Philippines - Nakalingkawas ang People Team A sa kulbahinam nga duwa pinaagi sa pag-iskor og 85-84 nga kadaugan bataok sa Prodigy Team A aron pagsakmit sa korona sa basketball event sa 3rd Society of Youth Business Executives and Entrepreneurs (SYBEE) Olympics diha sa Sacred Heart School-Jesuit (SHS-J) gym.
Ang People Team A nga gilangkuban sa Human Resource Development Management (HRDM) students, wala na molingi human miposte og 28-20 puntos nga bentaha sa first quarter. Ilang gitapos ang halftime sa iskor nga 46-39 ug dayon ilang giinat ang labaw ngadto sa 17 puntos, 67-50 paingon sa final period.
Si Roderick Arenasa maoy nangu sa People Team nga mibagdok og 51 puntos, samtang ang regular season MVP nga si Rey Alvarez miamot og 13 puntos.
Sa gubat alang sa ikatulong dapit, ang Team Solex nga gibitoonan sa legal management students, maoy mipatigbabaw batok sa Finance, 57-54.
Gawas sa basketball, ang People A nanghawod sab sa volleyball ug badminton.
Sa volleyball, ang People Team A milangkat sa women's volleyball title human gipilde ang Finance, 18-25, 25-20, 25-14. Nanghawod sab ang People A sa men's division human gipilde ang Prodigy B, 25-17, 21-25, 25-19.
Sa badminton, ang People Team A sa tandem nilang Erika Gutib ug Timothy Joshua Co milangkat sa mixed doubles crown human gipukan ang tandem nilang Kate Shielo Ang ug John Carlo Batiquin sa Blue team.
Ang men ug women's singles titles naangkon sa Kaizen (Operation Management) ug Blue (Executive Resource Management) teams.
Si Gerald Pepito sa Kaizen misakmit sa men's trophy, samtang si Kate Shielo Ang maoy miangkon sa women's crown.
Ang SYBEE usa ka grupo sa tanang business administration and commerce students sa University of San Carlos (USC).
Ang 3rd SYBEE Olympics gipasiugdahan sa SYBEE officers sa pagpangulo ni Gerald Pepito.
Puntos Matag Usa
Unang duwa
SOLEX (57) - Lim 20, Cabusas 8, Cao 8, Acua 6, Balbona 6, Blanco 5, Carreon 4
FINANCE (54) - Cohen 23, Tenchavez 20, Remond 6, Borja 3, Haban 2
Ikaduhang duwa
PEOPLE TEAM-A (85) - Arenasa 51, Alvarez 13, Cañizares 10, Cantancio 6, Estrera 3, Quijano 2
PRODIGY TEAM-A (84) - Co 30, Leyson 27, Miñoza 13, Doyll 4, Chris 3, Remorosa 3, Ongyon 2, Tio 2. - Yoyo R. Abayan (BANAT NEWS)