CEBU, Philippines - Mag-abot ugma ang mga boksidor nga mopakita’g aksiyon sa Rapid Fire-Binukbokay atol unya sa press conference diha sa Red Moon Café sa Gaisano Fiesta Mall Tabunok, Talisay City.
Inig human sa press conference nga tambungan sa mga kadagkoan sa DTT Events and Promotions, isunod dayon ang weigh-in sa mga boksidor nga pagadumalaon sa mga representante gikan sa Games and Amusement Board (GAB).
Ang boxing card nga himuon karong Sabado sa Talisay Sports Complex adunay pito ka professional fights ug 12 ka amateur bouts.
Sa main event, ang pambato sa Omega Stable sa Mandaue nga si Jason Canoy makigsangka batok ni Ruther Del Castillo sa Ringside stable sa Manila sa ilang 108-lbs.division showdown.
Si Canoy adunay 8-0, 6KOs win-loss record, samtang si Del Castillo nagbitbit og 12-3, 5 KOs.
Ang garbo sa Talisay nga si Andy Clever Senerez (5-2, 3KOs) sa Yanie Santa Cruz Stable makigsangka batok ni Jerpaul Valero (4-1, 2KOs) sa Phil-Australia Stable sa Mandaue City sa ilang six-round bout.
Mokompleto sa undercard mao ang sangka ni Memar 'The Brave' Dula batok Rey Villar, Jeffrey 'King Kong' Segara batok Ariel Adan, Sary 'Kamikazi' Canonigo batok Ervin Yamo ug Delmar 'Guapito' Cabatas batok Dionilo Salvador, Jr.
Ang mga tiket nagkantidad og P50 alang sa general admission, P300 sa upperbox ug P500 sa ringside. Mapalit na kini sugod karong adlawa diha sa Red Moon Cafe-Gaisano Tabunok. – BANAT NEWS