CEBU, Philippines - Mirehistro og career-high 36 puntos ang kanhi University of the Visayas (UV) Green Lancer nga si Rey Gastador aron baswaton ang J.M.A ngadto sa 108-104 nga kadaugan batok sa Kap Gawad sa Joy Young Cup- Invitational Tournament diha sa Benjamin Solon Memorial Gym diha sa barangay Ramos.
Way puas og sinukliay sa ilang mga puntos ang duha ka kampo sa unang-tulo ka kuwarter sulod sa tulo ka kuwarter. Nabugnaw ang sinukliay'g puntos sa katapusang singko minutos diin milabaw ang J.M.A. og dos puntos, 100-98 human sa lay-up ni Gastador.
Subling misikit ang Kap Gawad dihang napasulod ni kanhi M. Lhuillier Kwarta Padala Cebu Niños cager Danny Aying ang iyang triple sa himalatyong oras, 105-104.
Apan naabtan sa demalas ang Kap Gawad dihang wala kini makahimo og puntos mugna sa gipatumang hugot nga depensa sa J.M.A.
Ang free throw ni Alvin Rodriguez mao ang mihingpit sa kadaugan sa J.M.A
Si Rodriguez miposa og 17 puntos alang sa J.M.A, nga kasamtangang mikulit og 7-2 win-loss record, samtang si Aying, kinsa mipabuto og 38 puntos mao ang nangulo sa Kap-Gawad nga nagbitbit og 2-3 nga baraha.
Puntos Matag Usa
J.M.A (108) - Gastador 36, Rodriguez 17, Ararao 15, Ruiz 13, Sico 10, Sembrano 4, Rosaldo 3, Aliñabon 2, Mendoza 2, Sillar 2, Cua 2, Abarintos 2
Kap Gawad (104) - Aying 38, Millan 19, Zamora 12, Bantolinao 10, Dela 6, Pada 6, Ang 4, Camota 2, Membrano 2, Sabay 1. – BANAT NEWS