CEBU, Philippines - Upat sa walo ka bulawan ang nadaog sa Mambaling aron dominahon ang open division sa Mabolo leg sa 2009-2010 Go Ching Hai and Martina Cup and ML Kwarta Padala Cup Dancesport and Hip-hop Circuit Season 2 diha sa Mabolo Elementary School Complex.
Ang Brgy. Mambaling mikabkab sab og tulo ka silvers ug duha ka bronzes.
Sila si Jubert Suico ug Rommelyn Manto maoy bida sa kadaugan sa Mambaling nga mihakot og duha ka bulawan pinaagi sa junior latin ug standard action. Sila si Robby Masocol ug Namue Santillan mitunol og usa ka gold gikan sa youth latin class ug laing bulawan kortesiya sa tandem nilang Daryn Suarez ug Danica Canabes sa juvenile latin division.
Pakyas hinuon sila si Masocol ug Santillan sa ilang double gold human mapilde nilang Jamil Miñoza ug Jasmin Pogoy sa Ramos sa standard youth competition.
Laing nidaog og gold mao ang Brgy. Guadalupe sa tandem nilang Joseph Cantilla ug Krissa Marte Canoog sa junior latin.
Sa laing bahin, sa closed competition o niadtong ubos sa Mabolo area, sila si Janperson Baruc ug Iv Ghel Casas maoy nanghawod sa juvenile latin, sila si Warren Tuico ug Khate Macasero ang nanghawod sa latin junior, samtang sila si Roldan Abejo ug Carmelle Arenda sa latin youth division.
Sa standard action, sila si Edgardo Sanchez ug Mary Rose Macasero ang nidaog sa juvenile class ug sila si Jack Bolotano ug Marin Field Cortes sa youth class. – BANAT NEWS