CEBU, Philippines - Mga riders nga nawagtangan sa kahayag, ayaw kamo pagwagtang sa paglaum nga makabaton og titulo kay aduna pay laing kahigayonan nunot sa ipahigayong Habal-habal & Wanggits Showdown ugma didto sa Caduawan, Tabogon sa amihanang Sugbu.
Gawas sa habal-habal ug wanggits, may lumba sab alang sa executive A, executive B, beginners selection, beginners first timer, mini ug pewee.
Apan ang gikahinaman sa tanan mao ang lumba sa wanggits nga salmotan niadtong hermetanyo o nangaraan na og apil sa nagkadaiyang mga lumba nga hangtod karon wala pa gyud makaangkon og tropeyo.
Usa sa nagpanikad nga mopakita og balik sa iyang katakus mao si Junior Pestaño, ang DepEd District Supervisor sa San Remigio 2.
Mopakita sab og aksiyon sila si Edmund Pingkian, ang managing head sa Mandaue Sunriser Manufacturing Corp., Celfred Espina sa Lahug, Efren Sanico sa Mabolo, Bong Toong sa Liloan, Fredo Besavilla sa Lambosan, San Remigio ug Joe Ho sa Bogo.
"Alegre gyud ni ang lumba sa wanggits. Mga maayo man sab ni sila, wala lang makadaog kay naa may mas maayo pa nila," matud pa ni Siegfred Ornopia, ang tag-iya sa Keiz BJ Motors.
Gitug-an sab ni Ornopia nga aduna nay kapin sa 30 ka riders ang mosalmot sa habal-habal gikan sa nagkalain-laing dapit sa Sugbu.
Sa executive A, lakip sa mopakita'g aksiyon mao sila si Andy Krickl, Philip Montejo, Russel Gungob, Noli Rom, Jonathan Tapayan, Titing Sicad ug Marte Batulan.
Moapil gihapon sa executive B sila si Noli Rom, Philip Montejo, Jonathan Tapayan, Efren Sanico, Marte Batulan, Titing Sicad ug Bobong.
Sa laing bahin, ang kinamaguwangang anak sa magtiayong Siegfred ug Ellen Ornopia nga si Earl Jean Brylle mobalik na sa aksiyon sa labing unang higayon human mapiang ang tuong tiil atol sa 16th leg sa MS Motocross Series didto sa Liburon sa dakbayan sa Carcar niadtong miaging tuig.
Si Brylle mopakita'g aksiyon sa mini class, samtang ang iyang manghod nga sila si Ken ug Keizer moapil ubos sa pewee division.
Ang Hon. Zigfred Povadora Duterte Motocross Series nga gipasiugdahan sa Keiz BJ Motors gipaluyohan sab sa Sunriser Motorcycles. – BANAT NEWS