CEBU, Philippines - Napulo'g walo (18) ka teams ang mopakita'g aksiyon sa labing unang Barangay Lorega-San Miguel SK-FDH Inter-Color Basketball League 2010 nga buksan karong Enero 11 diha sa Lorega-San Miguel Barangay Satellite Complex, ning siyudad.
Mga koponan gikan sa nagkadaiyang sitio sa Barangay Lorega-San Miguel ang moparada sa kinakusgan nilang koponan sa 25-above division.
Gikaintapan nga mga koponan sa maong liga naglakip sa Sitio Serias, Lower Lawis (LEYC), Sitio Quadrangle, Sitio Camansi ug Sitio Echavez.
Ang makampiyon mobulsa og P3,000, ang second placer makadawat og P2,000 ug ang third placer makaangkon og P1,000.
Si SK chairman Juferlyn Yosores nagkanayon nga ang katuyoan sa maong liga mao ang paghiusa sa mga kabatan-onan sa Barangay Lorega-San Miguel ug aron usab malikay sa bisyu pinaagi sa sports.
Ang maong liga gipasiugdahan nila ni barangay councilors Julius Yosores, Julius Espina, Joan Enriquez Babayson, Nilo Dela Cerna ug Danilo Fuentes uban sa suporta ni Brgy. Capt. Fritzgerald Herrera ug SK chairman Yosores. – BANAT NEWS