CEBU, Philippines - Gidaro sa Bureau of Internal Revenue (BIR) dribblers ubos ni team captain Yoli Meso ang Department of Agrarian Reforms (DAR), 104-78 aron pagposte og 4-4 nga baraha sa nagpadayong Association of Regional Executives in National Agencies (ARENA-7) Sportsfest 2009 basketball tournament diha sa Centcom covered court sa Camp Lapulapu sa Lahug, ning siyudad.
Ang BIR milusad og 35-18 rally luyo sa paningkamot nilang Leo Galvez ug Clint del Rosario aron pagposte og 10 puntos nga labaw sa halftime, 50-40. Gikan niadto, wala na kapugngi ang BIR ug ila pang gipalawman ang labaw ngadto sa 20 puntos, 79-59 sa katapusang 10 minutos sa duwa.
Sila si Galvez ug Del Rosario parehong mibahog og 17 puntos aron pangulohan ang BIR, gisundan ni Robin Victor nga adunay 15 puntos, samtang sila si Meso ug Weng Dizon miamot og 12 puntos matag usa.
Si Leo Batiancila mao sab ang nangulo sa DAR pinaagi sa iyang 26 puntos, si Pableo Estenzo miamot og 22 puntos ug si Ronnie Gelbolingo mitampo og 18 puntos alang sa pilderong DAR.
Puntos Matag Usa
BIR (104) - Galvez 17, Del Rosario 17, Victor 15, Meso 12, Dizon 12, Bejemeno 8, Alburo 6, California 5, Dechosa 4
DAR (78) - Batiancila 26, Estenzo 22, Gelbolingo 18, Cabigas 8, Aballe 4. – BANAT NEWS