CEBU, Philippines - Napuhalan sa Aboitizland Team A ang ATS sa final match, 3-1, aron masakiyo ang kampiyonato sa labing unang Persimmon Plus Inter-Company Chess Tournament.
Ang Aboitizland nila ni Atty. Junie Omega, Ryan Villacorta, Maggi Dionson ug Mandy Baria mirehistro og 12.0 puntos aron mapukan ang ATS nila ni Renier Vistar, Zoilo Cadampog Jr., Gil Baring ug Jack Malabar human sa 7-round Swiss system match.
Mipahiluna sa ikaduhang dapit ang San Miguel Corporation nilang Rommel Asoqure, Cecil Aberion, Jolez Colmo ug Bong Pabilon human nila gipilde ang OPASSCOR nga gibitoonan nilang Antonio Riveral, Mark Alasagas, Florimae Velasco ug Albert Mula.
Ang OPASSCOR uban sa BSP and Company mitapos sa torneyo sa ilang 9.0 puntos, apan ang BSP and Company maoy miangkon sa ikatulo nga dapit human mikutlo og mas taas nga 18.0 puntos batok sa OPASSCOR nga adunay 16 puntos sa tie-breaker.
Sila si Rodrigo Alejandre, Allan Salientes, Jeric Josson ug Ramil Ajoc mao ang migiya sa BSP and Company. Ang Visayan Electric Company (VECO) nila ni Nic Cuizon, Hansel Tejadillo, Danny Alfafara ug Leo Flores maoy mikompleto sa top five sa ilang 8.0 puntos.
Giila nga board medalists sila si Rodrigo Alejandre sa BSP and Company (Board 1), Mark Alasagas sa OPASCOR (Board 2), Jorez Colmo sa San Miguel (Board 3) ug Mandy Baria sa Aboitizland (Board 4). (BANATNEWS)