CEBU, Philippines - Agi'g pagpangandam alang sa umaabot nga Lapu-Lapu City Jail Basketball Christmas League, karong Disyembre 11, ang team LLBA ug ang Inmates Selection mipahigayon og tune-up game dili pa dugay.
Sa maong duwa, ang LLBA maoy mipatigbabaw batok sa Inmates sa ilang kulbahinam nga duwa sa iskor nga 79-76.
Sila si Ram Gomez ug Kakay Versoza nagkumboya og 35 puntos aron pangulohan ang LLBA. Si Gomez mipupo og 20 puntos, samtang si Versoza miani og 15 puntos.
Ang Inmates nga naninguhang maka-eskapo gikan sa makutas nga duwa gipangulohan sab ni Michael nga miburak og 25 puntos, gisundan ni Babad sa iyang 16 puntos. Daku sab natabang si Apple Tuadles nga miligwat og 15 puntos.
Sa laing bahin, upat ka teams ang mopakita sa ilang katakus sa maong torneyo ug kini mao ang BJMP, Inmates Selection ni team capt. Apple Tuadles, LLBA ni team capt. Boboy Ciriaco ug Yan C Rico ni coach Jerry Agusto.
Ang torneyo nga duwaon sa matag adlaw'ng Domingo sa ala-1 sa hapon, mosubay og single round-robin format.
Mga ganting salapi ang nagpaabot sa unang tulo ka mananaog. Ang kampiyon makadawat og P5,000, ang second placer makaangkon og P3,000 ug ang third placer mobulsa og P2,000.
Puntos Matag Usa
LLBA (79) - Gomez 20, Versoza 15, Bobot 12, Ciriaco 7, Amigable 6, Bancale 5, Solis 5, Ngujo 4, Bascon 3, Velasquez 2, Giganto 2
INMATES (76) - Michael 25, Babad 16, Tuadles 15, Jumao-as 6, Quiling 4, Lumante 4, Fritz 2, Gani 2, Patalinghug 2, Rehoy 1. – BANAT NEWS