CEBU, Philippines - Mga boksidor gikan sa Omega Stable sa Mandaue City ang nidominar sa miaging edisyon sa “2009 Paboksing sa Barangay” niadtong miaging adlaw diha sa Day-as Sports Complex sa Brgy. Day-as, ning siyudad.
Si Jonas Sultan maoy unang mihatag og daog sa Omega Stable human niya gipukan ang pambato sa Bogo Stable nga si Junas Alburo sa ilang sangka ubos sa 51 kgs. division, gisundan ni Jack Tepura, kinsa midaog og puntos batok ni Jay-ar Barroma sa CCSC stable sa 46 kgs. division.
Mitunol sab og daog alang sa Omega Stable si Jalil Payao pinaagi sa pagpilde ni Zorro Zabel sa CCSC sa 51 kgs. division.
Bisan og gedamalas ang ilang mga boksidor, nakakuha gihapon og duha ka daog ang CCSC stable dihang sila si Alil Ala ug Allan Refuella milampos sa ilang kampanya batok sa tagsa-tagsa nila ka mga kaatbang.
Si Ala mipaluhod ni Lester Dula sa Sta. Cruz Stable, samtang si Refuella midaog pinaagi sa puntos batok ni Lyndel Raduc.
Mikompleto sa lista sa mga mananaog mao sila si Marvin Pumar sa Sta.Cruz Stable sa 25kgs. division, Margarito Moya sa Sanai Stable sa 34 kgs. category, Marvin Wagas ug Romel Banquirigo sa RWS Stable, Jay Molijon sa Bogo, Kim Flores sa CBA sa 47 kgs. class ug si Jobert Alvares sa Donaire Stable sa 5 kgs. division. (BANATNEWS)