CEBU, Philippines - Kapin na sa 500 runners ang nagparehistro alang sa 1st Eco-Fun Run “Go for Green” nga mosikad karong Domingo diha sa Asia Town I.T. Park sa Brgy. Lahug, ning siyudad.
Ang lumba adunay upat ka kategoriya -- 3K Open, 5K Open, 5K Media ug 10K Open.
Si race director Joe Deresas miangkon nga nakuha na nila ang katunga sa gidaghanon nga gilaumang mosalmot sa maong lumba.
Gibana-bana ni Deresas nga moabot sa 1,000 runners ang magginukdanay karong Domingo ug kasagaran niini gikan sa mga travel agencies ug mga kawani sa hotels dinhi sa Sugbu.
Gipahibalo sab ni Deresas nga ang registration hangtod pa sa adlaw'ng Sabado. Aduna kini registration fee nga P180 libre na ang singlet ug race number.
Niadtong buot mosalmot, mahimong magpalista sa Southwind Travel, Grand Hope Travel and Tours sa SM City, Grand Hope Ventures ug Pan Pacific Travel. – BANAT NEWS