CEBU, Philippines - Kompleto na karon ang koponan nga moduwa alang sa Super Leg nga ipahigayon dinhi sa Sugbu sunod semana, human gisakmit sa Trace-Laguna Stallions ang ikalima ug katapusang luna pinaagi sa pagpukan sa Forward Taguig, 70-68, niadtong miaging adlaw didto sa C.P. Tinga Memorial Hall.
Sa maong kadaugan, ang Stallions mouban karon sa ML Kwarta Padala-Cebu Niños, second seed Smart Pampanga Buddies, defending champion MisOr Meteors ug laing wild card qualifier Quezon Red Oilers.
Ang Sugbuanong si Jan Villaver maoy topscorer sa Stallions sa iyang 22 puntos lakip na ang lima ka triples. Si Alfie Grijaldo miabuno og 11 puntos uban ang unom ka rebounds.
Si Jeff Sanders, kinsa mihakot og 13 puntos mao sab ang nangulo sa pilderong Stallions, gisundan ni Ariel de Castro nga miamot og 11 puntos. – BANAT NEWS