CEBU, Philippines - Gipukan sa Kenyan missionary nga si Saimon Luisado ang giilang King of the Road sa Cebu nga si Mendel Lopez, human siya maghari sa 12-k men's open sa Rock N' Run 2 kagahapon sa buntag didto sa The Terraces sa Ayala Center.
Ang Kenyan mipakita dayun sa iyang kapaspas sa labing una niyang lumba dinhi sa Sugbu, dihang gitapos niya ang lumba sa oras nga 38 minutos ug 8.62 segundos.
Hinuon, si Lopez kinsa bag-o palang naalim sa iyang injury, nagsunod ni Luisado sa oras nga 39:06.82, samtang ang mikampiyon sa miaging Gullas Run nga si Revodem Aranas mao ang mipahiluna sa ikatulong dapit sa oras nga 40:25.06.
Sa 12-k women's division, subling milabni og laing kampiyonato ang Zamboangaeña nga si Mary Grace Delos Santos human siya mirehistro og oras nga 46:51.42, gisundan nila ni Madelyn Carter sa ikaduhang luna sa oras nga 49:59.68 ug Mary Joy Tabal sa ikatulong pwesto sa oras nga 50:58.09.
Wala usab magpauwahi si Elmer Bartolo ug Leizl Lumindas -Gitaruelas dihang nangharus sila sa ilang tagsa-tagsa ka dibisyon sa 5k Open.
Si Bartolo mikutlo og oras nga 17:20:23 aron labnihon ang titulo sa 5k men's open, gisundan nila ni Joel Delposo (17:27:35) ug Reprenel Banzon (17:34:33) sa ikaduha ug ikadtulong dapit.
Sa iyang bahin, ang sixth placer sa Mt.Kinabalu Climbathon nga si Gitaruelas maoy reyna sa 5k women's open, sa oras nga 19:44:33, uban sa iyang runner-ups nga sila si Bea Maximo (19:54:35) ug Lhoriz Echavez (20:00.90).
Si Ian Bernardino maoy labing paspas sa 3k men's category bitbit ang iyang oras nga 9:29:67, samtang si Jhean Adrean maoy midaog sa 3k women's sa oras nga 12:18:18. - Lemuel P. Maglinte (BANAT NEWS)