CEBU, Philippines - Napamatud-an gyud sa rooking nga si Tyreke Evans nga aduna siya’y luna alang sa Sacramento dihang iyang gibaswat ang Kings ngadto sa 104-99 nga kadaogan batok sa Utah Jazz sa napadayong 2009-2010 NBA season didto sa Energy Solutions Arena sa Salt Lake City, Utah.
Si Evans, ang fourth pick sa NBA draft kaniadtong Hunyo, nag-average sa Kings ug 30.6 puntos ug nangandoy nga mahimo siyang hari-hari didto sa Sacramento.
Kagahapon, si Evans mipugnit og 32 puntos samtang sila si Beno Udrih ug Andres Nocioni may 15 ug 14 puntos.
Ang Jazz gipangulohan ni Deron Williams kinsa mihakot og 29 puntos uban sa iyang 15 ka assists ug tulo ka rebounds.
Sa laing duwa, dali kaayong mibangon ang Boston Celtics human makatilaw og pilde gikan sa mga kamot sa Phoenix Suns ug ilang gipahimungtan ang New Jersey Nets, 86-76 aron padayong paghupot sa liderato sa ilang 7-1 nga baaha.
Parehong mi-iskor og 16 puntos sila si Rajon Rondo ug Paul Pierce aron pangulohan ang Celtics samtang si Brooks Lopez may 23 puntos ug si Rafer Alston may 20 puntos.
Sa laing duwa, gilubong sa Atlanta ang Denver, 125-100, naka-ipsot ang Chicago batok Charlotte, 93-90, gilubong sab sa Dallas ang Toronto, 129-101, midaog ang Milwaukee batok sa New York, 102-87 ug midaog ang Los Angeles Clippers batok sa Memphis, 113-110. - GGM via NBA.com (BANAT NEWS)