CEBU, Philippines - Ang inaugural season sa Cebu Collegiate Athletic Association (CCAA) nga pagasalmotan sa mga inilang high school teams dinhi sa Sugbu buksan karong alas-9 sa buntag adto sa Minglanilla Sports Complex.
Onse ka tunghaan ang mosalmot ning maong torneyo nga gipasiugdahan ni CCAA president Lorenzo 'Chao' Sy, kinsa mao sab ang direktor sa Basketball Association of the Philippines (BAP) dinhi sa Rehiyon 7.
Mag-abot sa opening game mao ang Minglanilla Gullas High School batok sa Sisters of Mary High School.
Ang ubang teams mao ang IHMA High, Mary Help Christian School, Lipata National High School, Tulay National High, Tungkop National High School ug ang National Science High School.
Mga opisyales sa Cebu Schools Athletic Foundation Inc. (CESAFI) nga pangulohan ni commissioner Felix Tiukinhoy Jr. ug si Atty. Baldomero C. Estenzo gipaabot nga motambong sa opening ceremonies.
Gipaabot sab nga motambong si BAP president Prospero 'Butch' Pichay ug si BAP secretary-general Graham C. Lim.
Sumala pa ni Tiukinhoy nga ilang suportahan ang maong proyekto ni Sy tungod kay mamahimo unya kining breeding ground sa CESAFI ug mahimong anhi na sila mokuha og mga players sa umaabot.
Uban pang matang sa paugnat sa kusog nga nalakip sa kalendaryo sa CCAA mao ang collegiate basketball, badminton, volleyball ug chess.
Si BAP regional commissioner Jose 'Boy' Murillo, maoy tournament commissioner. (BANATNEWS)