CEBU, Philippines - Miburak og 20 puntos si Gee-jun Bughao, samtang laing upat niya ka teammates ang mitampo sab og double figures aron pagtimon sa Water Market ngadto sa 84-79 nga kadaugan batok sa Park ‘N Go Bakeshop sa nagpadayong aksiyon sa Power Forty Christmas League niadtong Martes sa gabii diha sa Inayawan Sports Complex.
Ang Water Market temporaryo karong nag-una sa liderato bitbit ang 2-0 nga baraha. Ang www.fedguns.ph, kinsa midaog sab batok sa Nelly’s Farm, 87-78 maoy nagsunod sa standing nga adunay 2-1 win-loss record.
Si Vez Eleguin miposa og 16 puntos, samtang sila si Edwin Dejacto ug Allan dela Rama miabuno og 11 puntos matag usa ug si Mark Geonzon miamot og 10 puntos alang sa maong kadaugan.
Ang pilderong Park 'N Go gipangulohan ni Michael Arias pinaagi sa iyang 29 puntos.
Sa laing bahin, miburak og 21 puntos, si Rey Mabalcon aron pangulohan ang fedguns, gisundan ni Nestor Javierto sa iyang 18 puntos ug Bobong Rosal nga adunay 16 puntos.
Ang pilderong Nelly’s Farm nga wala pa makadaog sud sa tulo ka duwa, gipangulohan ni Carding Vernaiz, kinsa mihipos og 39 puntos, gisundan ni Danny Lisondra nga mikambiya og 21 puntos.
Puntos matag usa
Unang duwa:
Water Market (84) - Bughao 20, Eleguin 16, Dejacto 11, Dela Rama 11, Geonzon 10, Abellana 8, Yosores 4, Abella 2, Dacalos 2
Park ‘N Go (79) - Arias 29, Ozon 17, Layon 15, Dejarme 7, Atillo 4, Rama 3, R. Rama 2
Ikaduhang duwa:
www.fedguns.ph (87) - Mabalcon 21, Javierto 18, Rosal 16, Cabañero 9, Abadejos 8, Rabadon 5, Ibones 4, Abarquez 4, Ramil 2
Nellys’ Farm (78) - Vernaiz 39, Lisondra 21, Reyes 9, Cabase 4, Albaño 3, Navares 2 (BANATNEWS)