CEBU, Philippines - Ang University of Cebu (UC) misakiyo og tulo sa upat ka championship titles sa 2009 Cebu Schools Athletic Foundation Inc. (CESAFI) table tennis event diha sa University of San Carlos (USC) main gym.
Pakyas ang UC pagharos sa duwa kay ang ilang men's team nahimutang sa ikatulo sunod sa University of San Jose-Recoletos ug sa USC.
Sa women's division, ang UC nga gipangulohan sa bag-ong RP Team recruit Jennifer Jacalan, milampurnas sa USJ-R alang sa kinatumyang dapit.
Si Jacalan nidaog sab sa iyang duwa sa singles batok sa iyang teammate kaniadto nga si Sherilyn Gantuangko.
Ang UC naghari sab sa doubles category pinaagi sa pagpukan sa USJ-R, 2-0.
Sa secondary level, ang UC mao sab ang nanghawod sa boys ug girls divisions.
Ang UC boys squad nga gipangulohan ni Dannel Jay Tormis mipuhal sa Don Bosco Technology Center, samtang ang USJ-R mi-okupar sa ikatulo.
Sa girls bracket, ang UC mipukan sab sa USC, samtang ang Cebu Eastern College (CEC) mipahiluna sa ikatulo. (BANATNEWS)