CEBU, Philippines - Hingpit na miabante sa sunod hugna ang University of the Visayas (UV) Baby Lancers human gipilde ang University of Southern Philippines Foundation (USPF) Baby Panthers, 85-78 sa secondary match sa 9th Cebu Schools Athletic Foundation, Inc. (CESAFI) kagabii diha sa USC Gym.
Si Gerald Legarde nga maoy bugtong namuntos sa Baby Lancers, mipakgang sa gihimong rally sa Baby Panthers, kinsa nakabangon human malubong og 18 puntos sa third period, 52-34.
Usa sa mga tirador sa USPF nga si Rommel Diapera, mipatusak sa iyang three-point shot aron ilogon ang labaw, 70-69 sa nahabiling 5:08 sa duwa, apan ang free-throws nila ni Anthony Rommel Pero ug Glennson Ybañez maoy nakapaabante og balik sa Baby Lancers.
Si Mark Salazar mihaling og balik sa rally alang sa USPF pinaagi sa iyang upat ka triples sa final period aron hatagan ang iyang koponan og uno punto nga bentaha, 76-75 sa katapusang 2:35 sa duwa.
Sa tinguha nga moabante sa sunod hugna, sila si Mark Linao, Vincent Mendoza, Ybañez ug Legarde nagkurambos og mga puntos aron hatagan ang Baby Lancers og nuybe puntos nga labaw, 87-78 sa katapusang 14.6 segundos sa duwa.
Sila si Salazar ug Joshua Corcilles miposte og 17 puntos matag usa alang sa Baby Panthers, gisundan ni Monbert Aron, kinsa mitimang og 13 puntos, samtang si Diapera mitampo lang og 10 puntos.
PUNTOS MATAG USA
UV (85) – Legarde 32, Linao 13, Ybañez 11, Brigoli 9, Arong 9, Mendoza 6, Quilaton 5, Pero 3, Marata 2
USPF (78) – Salazar 17, Corcilles 17, Arong 13, Diapera 10, Baguio 10, Silao 4, Rosales 3, Gigante 2, Catipay 2 (BANATNEWS)