CEBU, Philippines - Giluwas nilang Rey Cataluña ug Paul Alelu Flores ang TORN squad gikan mga kamot sa Pitaju bitbit ang 57-52 nga kadaugan sa Association of Barangay Council (ABC) division sa Consolacion Fiesta Basketball Tournament diha sa Consolacion Sports Complex.
Nagtabla ang iskor, 50-all sa katapusang dos minutos sa duwa, apan si Cataluña mitusak og sunod-sunod nga baskets aron hatagan ang TORN og kuwatro puntos, 54-50 sa daginutong oras sa duwa.
Sa sunod nga ball position, si Tony Pepito nakakuha og basket aron makasikit ang Pitaju, 52-54, apan si Flores mibuhi og 3-point shot aron illikay ang TORN sa peligro nga kahimtang.
Si Flores, mipabuto og 20 puntos aron pangulohan ang TORN nga gilangkuban sa barangays Tugbungan ni Tony Tumongha, Poblacion Oriental ni Leking Caylan ug Nangka ni Rey Cataluña.
Si Tony Pepito miposa og game-high 20 puntos alang sa Pitaju, nga gimaneho sa mga magduduwa gikan sa barangays Pitogo, Tayud ug Jugan.
Sa lain pang mga aksiyon, si Lemuel Malagar mibugha og 32 puntos alang sa Poblacion Oriental, kinsa mipulbos sa Cabahangan, 62-41 sa Sangguniang Kabataan (SK) category, samtang ang CNHS mibuntog sa Tugbungan, 63-51 sa Inter-High School division.
Ang duha ka bulan nga torneyo nga usa sa mga kalihukan sa tinuig nga kapistahan sa lungsod sa Consolacion sunod bulan, gipasiugdahan sa ABC president Analee Gungob ug SK Federation chairperson Madel Hyacinth Herrera sa barangay Pitogo.
PUNTOS MATAG USA
Torn (57) - Flores 20, Tibon 10, Congson 9, Cataluña 8, Boyles 6, V. Lagahit 2, N. Lagahit 2
Pitaju (52) - T. Pepito 20, B. Pepito 12, Lahoy-Lahoy 8, Meliendres 6, Ygot 4, Maglasang 2 (BANATNEWS)