CEBU, Philippines - Human sa upat ka adlaw nga tigiay sa nagkadaiyang sports event, gipasidunggan kagahapon ang mga tunghaang ug ilang mga atleta nga nagmalampuson sa miaging 14th Milo Little Olympics-Visayas sa awarding ceremony didto sa Sm City, Entertainment Plaza, ning syudad.Ang University of Cebu (UC) maoy subling nigawas nga over-all champion sa secondary level sa ilang 184 puntos, samtang ang Abellana National School (ANS) maoy second placer human sila makatigom og 148.5 puntos ug ang University of San Carlos (USC) mitungtung sa third place pinaagi sa ilang 114.25 puntos.
Sa laing bahin, ang Sacred Heart School of Jesuits (SHS-J) maoy milangkat sa over-all championship sa elementary level human sila mirehistro og 58.25 puntos, gisundan sa Basak Community School nga mikulit og 49 puntos ug Pardo Elementary School nga adunay 47.16 alang sa ikaduha ug ikatulong dapit.
Hinuon ang UC miuli sa ilang ganting salapi nga nagkantidad og P40, 000 ngadto sa Milo aron itabang ngadto sa mga naigo sa bagyong Ondoy didto sa Manila. Ang SHS-J mibulsa usab og P40, 000, samtang ang second placer ug third placer midawat og P20, 000 ug P10, 000 matag usa.
Nakadawat og pasidungug isip Most Outstanding Athletes ang mga atleta sa elementary ug secondary level gikan sa nagkadaiyang tunghaan kinsa mipakita sa ilang katakus aron pangulohan ang ilang tunghaan ngadto sa kampiyonato.
Lakip sa mga nakadawat sa MOA award mao sila si Rozel Ardiente ug Vlessica Jagna sa athletics, Fritz Michael Sagaad ug Irish Mae Ares sa Badminton, Vic Glysen Derotas ug Queenlyn Torres sa Chess, Mark Veloso ug Carlito Abadia Jr. sa Football, Mikhaela Kirsten ug Karen Sthea sa Gymnastics, Jana Marie Pages ug Joseph Grel Tallo sa Lawn Tennis ug Jill Elaine Ugbinada ug Joy Policher sa Scrabble.
Ang record holder nga si Loren Dale Echavez sa USC uban ni Anthony Linn Navarro sa elementary division mao usab ang MOA awardees sa swimming. Si Jeramae Saromines ug Dannel Jay Tormis mao usab ang midawat og award alang sa Table Tennis.
Sila si Veronica Garces ug Keith Brian Fernandez maoy labing ngilngig sa Taekwondo ug si Mariel Menchavez ug Athena Sucalit mao ang MOA awardee alang sa Voilleyball.
Gawas sa paghatag og award, gipaila-ila usab kagahapon ang mga miyembro sa Team Bisdak nga maoy morepresentar sa Visayas alang sa umaabot nga Milo National Championship sunod buwan dinhi sa Sugbu. - Lemuel P. Maglinte (BANAT NEWS)