CEBU, Philippines - "Behave first and our arms are open for you."
Mao kini ang amahanong tambag gikan ni Cebu Institute of Technology (CIT) Wildcats team consultant ug kanhi coach Alex dela Torre, kinsa miingon nga ilang pasayloon ang ilang player sa high school nga si Patrick Niño Bancale human gitaktak tungod sa “attitude problem”.
Si Dela Torre mibutyag dinhi sa Banat Sports nga ilang pasayloon si Bancale sunod tuig ug hatagan siya’g laing higayon aron makaduwa pagbalik isip sakop sa Wilidkittens.
Gitaktak ni high school team consultant Mark Anthony Tallo si Bancale tungod kay matud pa niya wala na sila maka-agwanta sa kaligoy niini ug mi-surrender na ang head coach nga si Fernando 'Andot' Fuentes ug assistant coach Bembem Alcaraz tungod kay lisud kining dad-on.
Apan matud pa ni Dela Torre, posibleng ilang hatagan og laing higayon si Bancale sunod tuig apan mosaad kini nga magtinarong na ilabi na sa ilang praktis ug dili na magpa-uwahi kun aduna sila'y duwa.
Kun ilang masuta nga nagbag-o na si Bancale, walay katarungan nga dili nila pasaylo-on ang bata kay gusto sab nila nga hatagan og maayong kaugmaon si Bancale dili lang isip usa ka player kun dili isip usa ka tinun-an.
Matud pa niya nga dili sila gustong maguba ang kaugmaon ni Bancale ug ila kining paduwaon og usab sunod tuig kun aduna sila'y nakitang kausaban niini. BANAT NEWS