CEBU, Philippines - Sukdon sa eight-time champion University of the Visayas (UV) Green Lancers ang kabangis sa University of San Jose-Recoletos (USJ-R) Jaguars karong gabii uban ang paglaum modaog aron molingkod isip no. 2 qualifier sa quarterfinal round 9th Cebu Schools Athletic Foundation Inc. (CESAFI) basketball event diha sa Cebu Coliseum.
Mga Duwa Karon (Cebu Coliseum)
4:30 pm - UV vs. USC (Jrs.)
6:00 pm - UV vs. USJ-R (Srs.)
Ang Jaguars bag-o lang nakatangag og 79-73 nga kadaugan batok sa Don Bosco Technology Center (DBTC) Greywolves niadtong Martes sa gabii ug ang pagpahiluna sa ikaupat nga dapit maoy bugtong nilang kadangpan kun mapilde sila sa Lancers, kinsa naghupot karon og 5-1 nga baraha.
Nabulabog ang tinguha sa Jaguars nga tapuson ang elimination isip no. 3 qualifier tungod sa ilang kapildihan gikan sa mga kamot sa University of Southern Philippines Foundation (USPF) Panthers, 75-80 niadtong Septiyembre 12.
Ang University of San Carlos (USC) Warriors seguradong maoy mopasilong sa landong sa ikatulo nga dapit sa higayon nga adunay mahitabong triple-tie tali kanila ug sa USJ-R ug sa Southwestern University (SWU) Cobras.
Sa miaging duha ka duwa, ang Jaguars wala na makapakita og maayong labok batok sa Panthers ug ingon man sa Greywolves.
Gani atol sa ilang pakigsangka sa Greywolves, nakan-an ang daku nilang labaw ug miabot na lang og tres puntos, maayo na lang kay giluwas sila nilang Edwin Bibera ug Kurt Amores.
Katapusang misikit ang Greywolves sa iskor, 65-68 sa nahabiling 3:18 sa duwa human sa basket ni David James Cinco.
Si Bibera maoy nangulo sa Jaguars kinsa mirehistro og 23 puntos, samtang sila si Medget dela Rama ug Amores nagkumboya og 24 puntos.
Lima ka Greywolves ang mi-iskor og double figures sa ilang balanse nga opensa ubos sa pagpangulo ni Celso Colegado Jr., kinsa mihipos og 16 puntos. Ilang gitapos ang eliminasyon bitbit ang 0-7 nga baraha.
Puntos Matag Usa
USJ-R (79) - Bibera 23, Dela Ram 13, Amores 11, Duran 7, Lapiz 7, Pateño 6, Soliman 5, Villaver 4, Dela Peña 2, Alquizola 1
DBTC (73) - Colegado 16, Delos santos 13, Cabrilles 12, Villaver 11, Cicno 10, Castro 7, Guba 4. – BANAT NEWS