CEBU, Philippines - Gi-isip ni three-time trainer of the year Freddie Roach si Puerto Rican champion Miguel Cotto nga labing dakung babag sa dalan sa iyang batos nga si Manny 'Pacman' Pacquiao sa ila unyang sangka karong Nobiyembre 14 didto sa MGM Grand Garden Arena sa Las Vegas, Nevada.
Sa ilang press conference didto sa yutang natawhan ni Cotto didto sa Caguas sa Puerto Rico kagahapon, si Roach namahayag nga dili basta-basta ang sagubangon ni Pacquiao sa iyang pakgharong ni Cotto.
Gihulagway usab ni Roach si Cotto nga sama ni King Kong tungod sa kalig-on niini nga maoy nakapaaghat kaniya sa pag-apura ni Pacquiao nga mag-train og sayo aron makapangandam og maayo.
Si Pacquiao namahayag nga lisud ang pakigsangka batok ni Cotto tungod kay naandan niya ang welterweight division, dili sama kaniya nga kanunay nagtungas og timbang.
Giangkon usab ni Pacquiao nga mas lisud ang iyang sangka batok ni WBO welterweight titlist nga si Cotto, itandi sa mga away niya batok nila ni Juan Manuel Marquez, Erik Morales,
Oscar De la Hoya ug Ricky Hatton.
Matud pa ni Pacquiao nga gawas nga pabor ni Cotto sa gidak-on ug gitas-on, gipangandaman usab niya ang left hook sa lawas nga maoy labing hait nga hinagiban sa Puerto Rican.
Sa iyang bahin, si Cotto misaad sa atubangan sa iyang mga kababayan nga iyang panalipdan ang iyang bakus ug iyang dad-on sa Puerto Rico ang bag-ong WBC Diamond Belt . (BANAT NEWS)