CEBU, Philippines - Gisumpo sa Crossing Team gikan sa lungsod sa San Fernando, Cebu ang host Hans Team gikan sa dakbayan sa Naga, Cebu pinaagi sa pag-iskor og 71-67 nga kadaogan ug misakmit sa korona sa Open Category division sa BOS Officials League didto sa barangay Tangke sa Naga kaniadtong Biyernes sa gabii.
Sayong mi-arangkada ang Hans pinangulohan sa ilang star player nga si Joey Maquiling, ang numero unong kandidato pagka MVP ug ilang gitapos ang first quarter sa onse puntos nga abante, 19-8.
Padayong gidominar sa Hans ang second period apan wala magpakita’g bisan diyutay nga kakurat ang Crossing kinsa hinay-hinay nga misikit didto sa fourth quarter diin didto sab sila makahigayon pag-ilog sa labaw.
Si Mark Sarmosing kinsa maoy nangu sa Crossing, miburak og 17 puntos ug siya sab ang napiling MVP nga iyang nasakmit gikan kang Maquiling kinsa maoy paborito alang sa maong pasidungog.
Dihang hapit na unta mahuman ang duwa, kalit lang kini nahimong physical ug gipaundang ni Maquiling ang iyang kampo dihang gitawagan og technical foul ang ilang coach sa kataposang 3:29 sa fourth period tungod sa unsportsmanlike behavior.
Si Maquiling kinsa mao sab ang team owner sa Hans, maoy nangu sa iyang team pinaagi sa iyang 23 puntos.
Sa laing bahin, nasakmit sab sa Apache team ang kampiyonato sa Inter-Block category pinaagi sa pagpukan sa Swiss ug si Alfred Bartolabac maoy nahimong MVP.
Puntos matag usa:
Crossing (71)— M. Saramosing 17, E. Laboca 12, Zalsos 12, Tanghian 11, Bacalso 7, Enad 7, Barbon 2, B. Saramosing 2, Sarangsang 1
Hans (67)— J. Maquiling 23, Flores 13, Lapitan 8, Requillo 7, Samson 6, Orquiza 6, Adlawan 4. - Gabby G. Malagar (BANAT NEWS)