CEBU, Philippines - Duha ka mga ALA fighter nga sila si Milan Melindo ug Michael Domingo ang mopakita na usab og aksiyon batok sa mga bisitang Mehikano sa boxing event nga giulohan og “Duelo Del Guapos” didto sa Cuneta Astrodome karong Oktobre 3. Sila si Melindo ug Domingo mopakita sa ilang abilidad sa undercard sa away sa Pinoy nga si Drian Francisco batok ni Roberto Vasquez alang sa bakanteng WBA International superflyweight title.
Ang knock-out artist nga si Melindo gikatakdang makigharung ni Ivan “Pollito” Meneses sa usa ka ten rounder bout.
Naghinam-hinam karon si Melindo karon nga mo-away dihang wala mahinayon ang iyang sangka batok ni Denver Cuello sa undercard sa “Island Assault” sa Hawaii niadtong miaging semana, human mapakyas si Cuello paglukat og US visa.
Sa iyang bahin, si Domingo kinsa nahimong usa sa mga Pinoy boxer nga nihatag og dungog sa nasud sa miaging Boxing World Cup, muatubang og lisud nga hagit batok sa US Olympian nga si Jose Navarro kinsa nailhan nga usa ka lig-on nga boksidor tungod kay wala pa kini matumba sulod sa 30 niini ka away.
Sa pagkakaron, sila si Melindo ug Domingo nipa-ilawum karon sa usa ka walay puas ug makutas nga training didto sa ALA Gym aron seguraduon ang ilang kadaugan atubangan sa mga Pinoy, samtang laing duha ka Pinoy fighter nga sila si Michael Farenas ug Al Sabaupan ang mo-away usab sa undercard. – BANAT NEWS