CEBU, Philippines - Nanghawod ang Cebu City Sports Center (CCSC) stable dihang 12 sa ilang mga boksidor ang pulos nidaog sa Cebu City Amateur Developmental Tournament nga giulohan og “Paboksing sa Barangay 2009” niadtong miaging adlaw diha sa Barangay Pahina San Nicolas, ning siyudad.
Ang pambato sa CCSC nga si Junriel Jimenez mao ang unang nikulit og daog dihang iyang gilupig sa puntos si Edgar Moya sa Sanai Stable sa 38 kgs. division, samtang sila si Ardie Boyose ug Jay-R Barroma mipahunong sa tagsa-tagsa nila ka mga kaatbang.
Si Boyose mikulata ni Efford Pehales sa 40 kgs. class, samtang si Barroma mimakmak ni Jaylord Bangis sa Losamba stable.
Si Allan Rafuela mikulit og daog pinaagi sa desisyon batok ni Roldan Berezo sa Losamba stable, si Junrey Sta. Ana mipukan ni Jonas Sultan sa Omega stable.
Nanghasi usab ang lima ka amateur boxers sa CCSC sa 50 kgs. class nga sila si Raymund Empic, Ian Refuella, Ramjess Colina, John Kennan Villaflor ug Clifford Loreto human gipukan ang tagsa-tagsa nila ka mga kaatbang.
Bugtong boksidor kinsa wala magikan sa CCSC nga si Max Dumon sa Omega stable ang nilusot sa maong torneyo human niya gikulata si Jessie Omedia sa Losamba stable.
Ang maong torneyo gipasiugdahan nila ni Cebu City councilors Sylvan 'Jack' Jakosalem ug Raul 'Yayoy' Alcoseba ug Michel Lhuillier uban sa suporta sa Cebu City Government ubos sa liderato ni Mayor Tomas Osmeña. - Lemuel P. Maglinte (BANAT NEWS)