CEBU, Philippines - Nagpabiling walay pilde ang Don Bosco Technology Center (DBTC) pinaagi sa pagpuhal sa Sacred Heart School-Jesuit (SHS-J), 4-2 aron panalipdan ang ilang korona sa Cebu Schools Athletic Foundation Inc. (CESAFI) secondary football event sud sa upat ka sunod-sunod nga katuigan.
Mikiat dayon ang DBTC pagsugod sa kumbati ug miposte kini og 3-1 nga bentaha sa halftime.
Si Rico de Guzman mipahilom sa kabugnaw sa duwa sa milabay'ng otso minutos sa duwa. Sa sunod nga tulo ka minutos, si Miguel Caindic mitira og goal aron hatagan ang DBTC og 2-0.
Si Don Fernan mi-iskor sa SHS-J sa ilang labing unang goal sa 38th, apan si Peter Ricamora nakahigayon pagkutlo og iskor usa ka minuto sa dili pa mahuman ang unang-tunga aron hatagan ang DBTC og 3-1 nga bentaha.
Si Charles Caballes maoy mitunol sa katapusan ug ikaupat nga goal alang sa DBTC. Ang ikaduhang goal nga nakuha sa SHS-J naggikan ni Gabriel de Leon sa 75th.
Sa sayo pa, ang University of Southern Philippines Foundation (USPF) miblanko sa University of San Jose-Recoletos (USJ-R), 5-0 aron sa pagpahiluna sa ikatulong dapit.
Ang USPF miposte og 3-0 nga bentaha sa unang-tunga kortesiya nilang Joed Bulutano sa 7th, Jaco Omega sa 14th ug Jenard Dondoyano sa 30th.
Sila si Joel Syre ug Omega midugang og usa ka goal matag usa sa 55th ug 71st aron pagselyo sa kadaugan sa USPF. (BANAT NEWS)