CEBU, Philippines - Walo ka paresan ang magbinukbukay sa Asturias Mayor’s Cup Pro-boxing competition karong adlawa diha sa Asturias covered court sa Asturias, Cebu.
Sa main bout, si Philippine Boxing Federation (PBF) ranked 5 Jayson “The Gladiator” Siaton makigsangka batok ni PBF ranked 7 Aljun Salugaon sa 10 ka hugna nga away.
Ang walay pildeng si Renjie Abendan sa RWS Stable sa Cagayan de Oro City makigsangka sab ni Jayson Canoy sa Omega boxing stable sa eight round bout, samtang ang stablemate ni Abendan nga si Gedion Amba makigtakos usab ni Tiny Tyson sa Bohol.
Mokompleto sa undercard mao sila si Marco Demicillo batok Richie Abapo ug Fernando Ocon batok Jeffrey Pulvera sa 108 lbs. division.
Sa preliminary bouts, si Sonny Boy Lovedorial makigsangka batok ni Romano Gelig, Rolando Neones batok Kimmy Paypa ug Jolito Catubay batok Nemar Dula.
Ang tiket sa maong away nga sugdan sa alas-7 sa gabii nagkantidad og P50.
Gipasiugdahan ni Asturias Vice Mayor Joel Dumdum uban sa suporta ni Mayor Alan Adlawan, ang maong kalihukan gipahinungod sa kapistahan sa ilang mahal nga patron Snr. San Roque karong Agosto 16. - Lemuel P. Maglinte (BANAT NEWS)