CEBU, Philippines - Nakabawi gikan sa tulo ka sunod-sunod nga pilde ang Team 3 pinaagi sa paglubong sa YMTEC/McMill, 87-69 sa Basketball Association of Ramos (BAR) Jun Pe Fiesta Cup diha sa Benjamin Solon Memorial gym sa barangay Cogon Ramos, ning siyudad.
Human magtabla sa 18-all sa first period, kalit lang nanginit ang Team 3 pinangulohan nila ni Glenn Birao ug Jojo Baldago aron pagposte og 10 puntos nga bentaha sa halftime, 44-34.
Misulbong ngadto sa 18 puntos sa third period, 66-48 pinaagi sa ilang nagpungasi nga fastbreak points.
Si Birao milansang og 31 puntos aron pangulohan ang Team 3, samtang si Baldago miamot og 19 puntos ug si Erwin Ferrer mitampo og 14 puntos alang sa ilang ikaduhang daog sulod sa lima ka duwa.
Ang idlas nga point guard nga si Bebot Ancot ug ang forward nga si Dodong Elizalde maoy nangu sa YMTEC/McMill. Si Elizalde mihakot og 21 puntos ug si Ancot mipupo og 14 puntos.
Sila si Ganggang Navarro ug Nante Tampus mi-iskor sab og double figures alang sa YMTEC/McMill, kinsa nagbitbit og 3-2 nga baraha.
Puntos Matag Usa
Team 3 (87) - Birao 31, Baldago 19, E. Ferrer 14, Empleo 5, Espalanda 4, Rosaldo 4, T. Ferrer 4, Viajedor 3, M. Ferrer, Getigan 1
YMTEC/McMill (69) - Elizalde 21, Ancot 14, Navarro 10, Tampus 10, Dela Peña 6, Hapitan 4, Ybañez 2, Gabutero 1, Secuya 1. - Gabby G. Malagar