CEBU, Philippines - Napulo'g siyam (19) ka PBA aspirants ang pilion aron mamahimong kapamilya sa labing daku nga liga sa nasud sa ipahigayong 2009 PBA Rookie Draft karong hapon didto sa Market! Market! Mall sa Taguig City.
Sa 53 ka mga aplikante, 19 lang niini ang mabulahan ug makasulod sa liga human sa duha ka round sa draft.
Si coach Yeng Guiao ug Lito Alvarez sa Burger King gipaabot karong mokuha sa 6-foot-9 nga si Japeth Aguilar isip first pick.
Si Alvarez, kinsa mao ang representante sa Burger King nagkanayon nga hugot na ang ilang hukom nga kuhaon si Aguilar nga maoy kaugmaon sa ilang koponan human mawala kanila si Arwind Santos, kinsa mibalhin ngadto sa San Miguel Beermen.
Ang Burger King mao usab ang mopili sa No. 4 ug No. 9 pick sa first round.
Ang Purefoods Tender Juicy Giants maoy sunod nga mopili human nakahukom ang Coca-Cola Tigers nga dili mopili og rookie sa first round. Ang Rain or Shine maoy mobira sa fifth pick, Alaska Aces sa sixth pick, Barako Bull sa seventh pick.
Ang Barangay Ginebra maoy mopili sa ninth pick, samtang ang San Miguel maoy katapusang mopili sa first round.
Gawas ni Aguilar, giatngan usab nga mosulod sa top picks mao ang mga UAAP cagers nga sila Rico Maierhofer, Marcy Arellano, Edwin Asoro ug kanhi MVP nga si Jervy Cruz. Kusog usab ang labok sa mga Fil-Am nga sila si Kevin White, Ramsey Williams ug point guard nga si Chris Ross.
Manimpad usab karong adlawa si M. Lhuillier Kwarta Padala cager Richard Ian Saladaga. (BANAT NEWS)